Вежбајте на работа

Вежбајте на работа

Работата нѝ претставува значаен дел од животот и сѐ повеќе време поминуваме таму, на работното место, заковани за столицата. И како што работните обврски не се веќе копање бавча и напорна физичка работа, за таа сметка ние сме сведоци на сѐ повеќе состојби на телото и умот кои не нѝ помагаат во стресната околина. На тоа се надоврзува реченицата „Немам време да вежбам.“, „Немам време да пијам вода, да јадам, да прошетам.“ Сето тоа би не подржало да го поткрепиме нашето физичко и ментално здравје, а во исто време да станеме поактивни и попродуктивни. Уште повеќе, многу истражувања укажуваат на тоа дека нѝ се потребни 30 минути вежбање во текот на денот, 5 дена во неделата, за да делуваме превентивно на резултатите од стресниот, седечки живот, посветен на работата.

Ќе речете дека е невозможно да се вежба на работа. Каде? Не секој бизнис има фитнес сала. Но, се сеќавате дека сѐ што сакаме, мора да нѝ биде постојано пред очите. Или барем, она што нѝ е пред очите да го искористиме за вежбање во случајов. Секако се работи за лесни аеробични вежби, вежби за истегнување и за оснажување, со кои нема сигурно да станеме олимписки прваци во трчање или фрлање ѓуле. Но истите се доволни да се освежиме, зацврснеме и да се вратиме во ефективен и продуктивен мод.

Најпрво, ставете си го шишето со вода на масата штом ќе стигнете на работа. Во фиоката чувајте семенки, јаткасто и сушено овошје, кои можете да ги јадете во текот на денот, а ќе ви ја покачат енергијата. Искористете ја секоја можност да излезете надвор и да дишете длабоко. Или да прошетате еден круг. Одете на работа со велосипед. Или уште подобро пешки.

А потоа:

  1. Додека седите, подигнете ги стапалата и тапкајте ги на подот, боси, побавно кон побрзо. Или притискајте ги од подот ножните прсти, ивиците на стапалото, целото стапало. Раздвижете ги.
  2. Избегнувајте лифтови и употребувајте ги скалите.
  3. Трчајте во место, високо подигнувајќи ги колениците.
  4. Направете барем десет клекнувања покрај вашата столица или потпрени со грбот на сидот клекнете и задржете се во клекната позиција 30 – 60 секунди (или 8 часа).
  5. Не користете телефони. Станете од столицата и трчајте кон колегата кој сакате да го прашате нешто или кон салата за состаноци.
  6. Размрдајте го телото во столицата почнувајќи од главата, рамениците рацете, нозете. Танцувајте седејќи.
  7. Трудете се да стоите и да шетате низ канцеларија секогаш кога е тоа возможно.
  8. Застанете и подигнете се на прстите од стапалата, рацете подигнете ги исправени високо над главата, останете во таа позиција и вратете се. Ова можете да го правите и со едната нога подигната. Повторете го 15-тина пати.
  9. Едноставно стегнете ги бутините и мускулите на задникот, држете ги така 10 секунди и потоа отпуштете ги. Направете го тоа барем десетина пати.
  10. Седејќи на столицата подигнете ја едната или двете нозе, испружете ја и истегнете ја. Држете ги во таа позиција десетина секунди, спуштете ги долу, но така да не го допираат подот. Повторете ја вежбата петнаесетина пати.

Ова се само некои од вежбите кои можете да ги правите на работа. Доколку сакате цел сет на вежби за размрдување, потсетете се на вежбите кои како деца ги правевме за загревање на часовите по физичко воспитување, се сеќавате? Тоа е тоа.

Најважниот момент во сето ова е вашата одлука да се грижите за своето здравје, а со тоа ќе придонесете кон подобри лични резултати на работа. Сѐ е поврзано. И многу е лесно штом еднаш ќе се договорите со себе. Само треба да го направите првиот чекор.

Претходен напис
Work-Life Balance
Претплатете се на нашиот Newsletter

Бидете во тек со сите настани, новости и попусти!